Kisitsisinik 2014-imi qaammatini qulingiluani siullerni tungasunik appaaneq

Avaleraasartuunik avammut tunisineq Kalaallit Nunaanni suli nutaajuvoq, taamaammallu taakkunannga avammut tunisinermi paasissutissanik nalunaarsuineq suli killeqarluni. Taamaattumik Kalaallit Nunaanni Naatsorsueqqissaartarfik nammineerluni tunisat annertussusaannik nalinginillu paasissutissanik assigiinngitsuninngaanniit katersuisarpoq. 2014-imi qaammatini siullerni qulingiluani avammut niueqateqarnermi kisitsisit saqqummersinneraniit, Kalaallit Nunaanni Naatsorsueqqissaartarfik avaleraasartuunut kiilumut akinik paasissutissanik allanik peqalersimavoq, tassanilu avaleraasartuut kalaallit aalisariutaat nunat allamiullu aalisariutaat atorlugit pisarineqarsimasut immikkoortinneqarsimallutik.

 

Avaleraasartuut kalaallit aalisariutaat atorlugit pisarineqarsimasut, avammut tunisinermi agguaqatigiisillugu kiilumut 7,05 koruuninik akeqartillugit nalunaarsorneqarput.

 

Nunat allamiut aalisariutaat atorlugit avaleraasartuunik aalisarneq imatut pisarpoq, aalisariutileqatigiit kalaallit nunaanniittut avaleraasartuunik pisassinneqarsimasut, nunat allamiut aalisartittarpaat taakkununngalu aalisakkat akikillillugit tunisarlugit, piumasaqaatigalugulu nunat allamiut aalisarnerminni aningaasartuutit namminneq matussusissagaat. Taamaattumik avaleraasartuut nunat allamiut aalisariutaat atorlugit pisat, agguaqatigiissillugu 1,87 koruuninik akeqartillugit nalunaarsorneqarput.

 

2014-imi qaammatini qulingiluani siullerni kisitsisinik saqqummiussani, avaaleraasartuut avammut tunisat agguaqatigiissillugu kiilumut 7,8 koruuninik akeqartillugit nalunaarsorneqarsimapput. Qulaani taakkartukkap kalaallit aalisariutaanik nunat allamiullu aalisariutaannik pisanik immikkoortitsinerup kingunerivaa, 2014-imi qaammatini qulingiluani siullerni kisitsisit saqqummiussat 291 mio. koruuninik naqqiissuteqarfigineqarneri.